Aðgerðaáætlun í loftslagsmálum

Ísland er aðili að Parísarsamkomulaginu og tekur þátt í sameiginlegu markmiði Evrópuríkja um að draga úr losun gróðurhúsalofttegunda um 55% fram til 2030. Til að ná þessum markmiðum þurfti að bæta verulega í aðgerðir miðað við fyrri áætlun frá 2020.

Á vettvangi umhverfis-, orku- og loftslagsráðuneytisins var farið í víðtækt samráð við sveitarfélög, atvinnulífið og félagasamtök á 2 ára tímabili á árunum 2022-2023. Niðurstaðan er metnaðarfull uppfærð áætlun með 150 vel skilgreindum aðgerðum og mælanlegum markmiðum.

Til að kynna áætlunina og upplýsa vel um hana næstu árin þurfti ráðuneytið vef sem er einfaldur í notkun, kemur vel út í öllum tækjum og sýnir nægilega mikið af upplýsingum til að svala þörf almennings, sérfræðinga og fjölmiðla um efnið.

Aðgerðirnar eru í fjórum kerfum sem hvert fékk sinn lit. Notast er við loftlagsmyndir af íslensku landslagi. Hægt er að staðsetja sig á vefnum eftir hversu „tætt“ ofangreind grafík er. Á efsta lagi í leiðarkerfinu má greina landslagið skýrar en það verður ógreinilegra þegar kafað er dýpra niður í smáatriði um aðgerðirnar.

Lagt er upp úr skýrri framsetningu og skipulagi, sem er skiljanlegt almenningi, fjölmiðlum og sérfræðingum. Ætlunin er að ná betri samstillingu um það sem þarf að gera til að ná markmiðum Íslands.

Kolibri hannaði aðgengilegt leiðarkerfi utan um tiltölulega flókið skipulag upplýsinga með töluvert af fagorðum, þar sem kemur skýrt fram hvaða aðgerðir stendur til að hrinda í framkvæmd og hvernig þær skiptast í mismunandi kerfi, flokka og undirflokka. Fyrir hverja aðgerð er undirstrikuð staða, tímalína og mælanlegt markmið um samdrátt í losun, sem svalar forvitni notenda.