Íslenskuvefurinn m.is fór í loftið haustið 2024. Vefurinn gerir orðabækur, gagnasöfn um íslensku og máltæknilausnir aðgengilegar á einum stað, á forsendum notenda málsins.
Kolibri sá um mótun og hönnun vefsins í samstarfi við menningar- og viðskiptaráðuneytið, en útfærsla var í höndum Árnastofnunar.
Árnastofnun hefur um árabil þróað og haldið utan um tækniausnir og gagnasöfn sem styðja við notkun íslenskunnar. Þessar lausnir, t.d. orðabókin og beygingarlýsingin, hafa þróast í gegnum tíðina hver á sínum forsendum. Menningar- og viðskiptaráðuneytið tók höndum saman við Árnastofnun um að gera þessar lausnir aðgengilegar á einum stað til að auka veg íslenskunnar í stafrænum heimi.
Kolibri fór í vettvangsheimsóknir í grunn- og framhaldsskóla og kafaði ofan í þarfir nemenda og kennara. Fljótt kom í ljós að ungt fólk og fólk með íslensku sem annað mál leitar almennt ekki í öflugustu orðabækurnar eða gagnasöfnin um íslensku á netinu, Skýringuna var meðal annars að finna í fjölda mismunandi lausna, erfiðleika með að uppgötva þær og eldri hefðum í framsetningu niðurstaðna.
Í kjölfarið hannaði Kolibri vefviðmót með nýrri og ferskri mörkun, í þéttu samstarfi við sérfræðinga Árnastofnunar og ráðuneytisins. Mörkunin sækir innblástur í hefðbundnar orðabækur og sameinar við fagurfræðina í nútíma veflausnum. Viðmótið nýtir þann fjársjóð sem liggur í orðabókum og gagnasöfnum, en endurhugsar á sama tíma hvernig uppfletting á sér stað og upplýsingar eru settar fram.
Árnastofnun sá um tæknilega útfærslu á vefnum og allar tengingar við gagnasöfn stofnunarinnar. Þróun var í nánu og stöðugu samstarfi við viðmótshönnuði Kolibri, sem sáu einnig um notendaprófanir. Vefurinn verður í stöðugri þróun og er tilbúinn fyrir áframhaldandi þróun á nýjum og núverandi undirliggjandi máltæknilausnum frá Árnastofnun og aðilum á markaði. Afraksturinn er lausn sem eykur veg íslenskunnar og einfaldar málið.