Listasafn Íslands

Með nýjum vef Listasafns Íslands er hulunni svipt af einstöku safni af íslenskri myndlist og fólk boðið velkomið. Gott aðgengi er að upplýsingum um starfsemina í húsakynnum safnsins, sem er á þremur stöðum í Reykjavík. Sérstök áhersla er lögð á að sýna að starfsemin nær langt umfram hefðbundið sýningahald. Notendur vefsins fá að kynnast söfnun myndlistar, metnaðarfullri fræðslu og rannsóknastarfi.

Samstarfsaðilar okkar og Listasafnsins í verkefninu voru Greipur Gíslason, Bergur Ebbi og E&co.

Með nýjum vef og leitarvél Listasafnsins varð bylting í aðgengi almennings að íslenskri myndlist. Notast var við Algolia leitarvélarlausnina og skráir hún öll verk Listasafnsins eins og þau birtast á Sarpur.is, menningarsögulegu gagnasafni, sem Listasafnið á hlut að. Það leyfir leitarvél Listasafnsins að splæsa sínum eigin gögnum og ljósmyndum saman við skráningar Sarps, eykur hraðann margfalt, og leyfir snjallari leit.

Í stefnumótun og notendarannsóknum kom fram að safngestir áttu stundum erfitt með að átta sig á staðsetningu og starfsemi safnsins sem dreifist á þrjú hús. Þar á meðal þótti inngangur í aðalsafnið við Fríkirkjuveg ógreinilegur. Af þeirri ástæðu var ákveðið að leggja sérstaka áherslu í framleiðslu á myndbandi á forsíðu hvernig aðkoma að húsunum er og undirstrika betur að þetta eru fleiri en eitt hús. Ljósmyndirnar draga fram mismunandi karakter húsanna. Myndbönd voru framleidd í samstarfi við Skjáskot og ljósmyndir teknar af Svanhildi Kristjánsdóttur.

Útkoman er vefur sem færir Listasafn Íslands nær nútímanum og til almennings. Listasafn Íslands er safnið okkar allra. Vefurinn allur og ásýndin var einfölduð með því að samstilla öll efnistök og gera þau hnitmiðaðri. Framsetning á grundvallarupplýsingum var stórbætt, eins og um opnunartíma, staðsetningu safnhúsanna og starfsemina. Sýningum og listaverkum er gert hærra undir höfði með vönduðum sýningarsíðum, öflugri leit og betri og fallegri síðu.