Reykjavík

Það þykir sjálfsagt í dag í mörgum sveitarfélögum, en þótti ekki áður. Umsækjendur um fjárhagsaðstoð, sem er oft síðasta úrræðið í velferðarkerfinu, þurfa ekki að eyða tíma eða orku í að skilja hver þjónustan er og hvernig hún virkar. Þau þurfa ekki að kvíða fyrir heimsókninni á þjónustumiðstöð eða samtalinu við þjónustufulltrúann. Nú skráir umsækjandi sig einfaldlega inn með rafrænum skilríkjum og svarar nokkrum spurningum. Eftir það er birt skýr sýn um stöðu og framvindu umsóknarinnar.

Samhliða umsókninni þróuðu Reykjavíkurborg og Kolibri afgreiðslulausn fyrir umsóknir sem hefur verið innleidd í aðlagaðri mynd á vegum Sambands íslenskra sveitarfélaga og Stafræns Íslands hjá 10 öðrum sveitarfélögum síðan. Afgreiðsluviðmótið einfaldar afgreiðslu og samskipti við umsækjanda, og minnkar handavinnu.

Tímasparnaðurinn sem fólst í að hætta prentun, skönnun, ljósritun og að útskýra sömu hlutina aftur og aftur fyrir fólki var raunverulegur, en engum var sagt upp. Tíminn sem sparaðist fór einfaldlega í að veita betri velferðarþjónustu - að styðja við umsækjendur til að gera þeim kleift að komast fyrr af fjárhagsaðstoð og standa á eigin fótum.